Urumea bailarako artistek hitzordu garrantzitsua dute abenduaren 23an: Hernaniko Sortzaileen Azoka. Hirugarren edizioa izango da aurtengoa, eta ez da ohi moduan Atsegindegin izango; aurtengo azoka Plaza Berrira lekualdatu dute. Goizeko 10:30etan irekiko dute Hernaniko Sortzaileen Azoka, eta eguerdiko 14:30etan itxiko dituzte ateak. Guztira 17 postuk osatuko dute azoka eta proiektua bailarako sortzaileek eraman dute aurrera, Dobera-Kronikaren eta Hernaniko Udalaren laguntzarekin.
17 postuz osatutako azoka ederra
Hona hemen, Sortzaileon Azokako postuak: Nerea Molano 'Bihurri', hiru dimentsiotan inprimatutako diseinuak; 'Ni Naiz'; Uxue Bereziartua 'Berexiart' diseinua, Marina 'Itzal' diseinua; Aziz eta Maialen 'Puochinah' arropa afrikarra, Maitane Anduenza 'Maitandu Makrame' makramezko produktuak; Amaia Zuaznabar 'Zatika', hiru dimentsiotan inprimatutako bitxiak; Nagore Intxausti Ekinazea-Elur; Estela 'Sigue la estela, baby' umeentzako produktuak, Maixus Jauregi 'Oliparok'; Ana Velez, 'Koloreztatu' xaboiak eta kosmetika, Garazi Loiarte 'Txirikorda', konplementuak; Laura Pacheco 'Laupitxiak'; Arrate eta Nekane; Ester 'Hiruloretxo' puntoa eta gantxilloa; Paki Korapilatuta, panpin jantziak; eta Izaskun eta Josune, ukenduak, xaboiak...
Abenduaren 23an izango da Sortzaileen Azoka, eta herritarrek aukera ederra izango dute tokiko sortzaileen produktuak erosteko, Gabonen bueltan. Beraz, ez galdu aukera!