Bihar arratsaldean itxiko du KarmeLaHoz artistak performance zikloa, Lau Urtaroak izeneko saioarekin. Ekitaldi honen bidez «gizakiaren ekintza arduragabeek» naturan eta klima aldaketan eragiten duten inpaktu negatiboari buruzko gogoeta egiten du artistak.
Batik bat, erregai fosilen erabilera ekiditeko ideia nabarmenduko dute performancean: «Erregai fosilak beltzez jantzitako elementu gisa irudikatuko ditugu, lau urtaroak erasotzen dituzten elementu gisa. Finean, klimaren eta ingurumenaren aldeko manifestu bat izango da biharkoa», azaldu du.
Koreografia eta mugimenduak Txaro Unzilla hernaniarrak sortu ditu, Wim Mertensen melodiak erabilita. KarmeLaHozekin batera, Miren Gojenola, Enara Agirrezabala, Eba Lausen, Jaione Irazu, Ana Lore Elosegui eta Carla Ferreño arituko dira.