Euskararen Nazioarteko Egunaren harira, ekintza ugari izango dira Hernanin asteazkenetik hasita. Helburua euskara praktikatu eta euskaraz gozatzea da eta mintzodromoa izango da lehen ekitaldia, azaroaren 29an, goizeko 10:00etan Milagrosan.
Asteburuko menua, bertso eta kantu bazkariek zein bakarrizketek osatuko dute: abenduaren 2an, larunbatean, Aitor Mendiluzek eta Nerea Elustondok jarriko diote ahotsa bazkariari Elur Txori Elkartean, eguerdiko 14:00etan eta abenduaren 3an, bakarrizketak gustuko dituenak Gorka Olazabal eta Telmo Irureta entzuteko aukera izango du, Guria tabernan, arratsaldeko 19:00etan. Kantu bazkaria ere igandean izango da, 14:00etan. Goiz Eguzkik antolatu du eta betiko euskal abestien letrak banatuko dira.
Musika giroan jarraituz, abenduaren 4an, astelehena, euskal kantuekin osatutako bingoa izango da arratsaldeko 18:00etan Milagrosan. Dobera Elkarteko kideek adierazi dutenez «primerako sariak» egongo dira eta txartel bakoitzak euro bateko kostua izango du. Azkenik, asteartean, hitzaldia egongo da Biteri Kultur Etxean: «Nola eragin gure seme alaben hizkuntza ohituretan?». Sarrera doakoa izango da eta arratsaldeko 17:30etan hasiko da.
Dobera Elkarteak herritarrei ekintzetan parte hartzeko gonbitea luzatu die: «Animatu zaitezte parte hartzera eta gozatu euskararen egunak!».