Lau partidutan laugarren garaipena lortu zuen Hernaniko senior nesken taldeak, Tolosako Tolobolei taldearen aurka. Espero zen modura, partidu gogorra izan zen eta azken emaitzak, 3-1ekoak, partidu erraza izan zela pentsarazi arren, ez zen horrela izan.
Lehenengo bi jokoak erraz irabazi zituzten hernaniarrek, 25-14 eta 25-11, baina hortik aurrera partidua oso ezberdina izan zen. Hernaniarrak erlaxatu egin ziren, 2-0eko abantailarekin, eta tolosarrak, 22-25eko tanteoarekin, 2-1ekoa ezartzea lortu zuten. Azkeneko jokoa oso parekatua eta borrokatua izan zen. Azkenean, 26-24 irabazi zuten laugarren seta etxekoek. Asko landutako garaipena izan zen, ez dela erlaxatu behar erakusten duena.
Jubenil mutilek, irabazi
Jubenil mutilek ez zioten aukerarik eman Aidean talde zarauztarrari, eta 3-0 irabazi zuten, 25-11, 25-12 eta 25-13ko tanteoekin. Neska kadeteetan, garaipen bat eta bi porrot izan zituzten hiru taldeek. Garaipen bakarra Hernani 2 taldeak lortu zuen, Oarso taldearen aurka (3-0); eta porrotak Hernani 1 taldeak eta Hernani 3 taldeak izan zituzten. Mutil kadeteek erraz irabazi zioten Usurbilgo Udarregiri (3-0).