Hitzordu berezia jarri dute igande honetarako, Osiñagako auzotarrek. Udazkeneko Azoka antolatu dute bertako ekoizleek, eta goiz osorako festa prestatu dute. Itxas-Buruko aparkalekuan jarriko dute azoka, eta 11:00etatik 13:30etara izango da bertan.
Osiñagako sei ekoizleren produktuak izango dira eskuragarri, lau postutan banatuta: Lurrarekiko Harremana, Perrapa baserria, Arriatzu baserria, Zatika diseinuak, Telleria haragiak eta Txintxuenea.
Azoka girotzeko, beste hainbat ekintza ere antolatu dituzte bertan. Batetik, erakustaldia eskainiko du Kimetz Oñederra aizkolariak. Bestetik, bertsotan arituko dira Andoni Mujika 'Anatx' eta Iker Ormazabal 'Tturko'.
Eta azkenik, sagardo dastaketa eta pintxoak ere izango dira, hori guztia ere auzoko bertako produktuekin: Osiñagako sagardogileek jarriko dute dastaketako sagardoa, eta auzoko produktuekin egindakoak izango dira pintxoak.