Beste urte batez, ostirala iluntzen hastearekin batera egin zuen agerraldia, Txantxilla auzoan, Arima bihurriak. Eta orduan bai, auzotar guztiak elkartuta, eman zieten hasiera Txantxillako Jaiei, modurik onenean: Maialen Lujanbioren eta Eli Pagolaren bertsoak batetik, Zuttik elektrotxarangak eta DJ Andergroundek jarritako musika bestetik, eta pintxopotea auzoko tabernetan eta txosnan, sabela betetzeko.
Baina beroketa besterik ez zen izan hori, festen egun nagusirako. Gaurkoa izango da horixe, goizetik gauera beteko baita jolasez, musikaz, jan-edanez eta ipuinez auzoa. Eta 'arimaz' ere bai, noski.
Haurren lasterketa, jolasak eta auzo-ginkana, goiza girotzeko
Haur eta familientzako ekintzaz betetakoa izango da gaurko goiza, ohitura den bezala. Hasteko, haurren lasterketa egingo dute auzoaren inguruetan, 10:30etan hasita. Korrika saioak bukatu, eta jolaserako tartea zabalduko dute, baina baita auzoan zehar probak egitekoa ere. Izan ere, auzo-ginkana prestatu dute 11:00etarako, parte hartu nahi duten guztientzat.
Eguerdian ez dute hutsik egingo sagardo dastaketak eta pintxoek, baina izango du berezitasunik, ondo baino hobeto girotuko baitute: kontzertua eskainiko du Hernasax musika taldeak, 12:00etan hasita.
Zapotxin pailazoaren ipuin kontaketa eta Arimen kalejira, arratsalderako plana
Mahaiaren bueltan elkartuko dira auzotarrak ondoren, bazkaria elkarrekin egiteko. Eta indartsu helduko diote arratsaldeari. Aurrena, Zapotxin pailazoaren bisita jasoko dute, eta ipuin kontaketa saioarekin piztuko ditu bertaratuen irribarreak eta algarak.
Meriendarik ez da faltako, txokolatada ere egingo baitute. Eta segidan iritsiko da, eguzkia ezkutatzen hastearekin batera, eguneko momentu bereziena: adin guztietako auzotarrek, ondo mozorrotuta, Arimen kalejira egingo dute Txantxillan barrena, Hernaniko dultzaineroen laguntzarekin.
Andoni Ollokiegiren musika Txantxillara bueltan, gaua pizteko
Baina Arimen kalejira bukatzearekin batera, oraindik ez da itzaliko festetako sua: Andoni Ollokiegi musikari pasaitarrak piztuko du gaua auzoan. Iluntzeko 20:30etan hasiko du bere emanaldia, ondo ezagutzen duen plaza batean. Izan ere, ez du aurreneko aldia izango Ollokiegik Txantxillan: aurtengo maiatzean eskaini zuen kontzertua bertan, Kultur Bira egitasmoaren baitan.
Bere emanaldia bukatutakoan, orduan bai, azken trakarekin emango diete bukaera aurtengo Txantxillako Jaiei.
TXANTXILLAKO JAIETAKO EGITARAUA
GAUR, larunbata
10:30, Haurren lasterketa
11:00, Haur-jolasak
11:00, Auzo-ginkana
12:00, Sagardo dastaketa eta pintxoak
12:00, Hernasax musika taldearen kontzertua
14:30, Auzotarron bazkaria
17:00, Zapotxin pailazoaren ipuin kontaketa saioa
18:00, Txokolatada
19:00, Arimen kalejira, Hernaniko dultzaina taldekoekin
20:30, Andoni Ollokiegiren kontzertua
Ondoren, Festen amaierako traka