Ostiral honetan jokatuko dute Pello Errota Bertsolari Sariketako finala, Asteasuko Iturri Ondo jatetxean. Afalostean mahai inguruan jardungo dira finaleko lau bertsolariak: Eñaut Martikorena hernaniarra, Jexux Mari Irazu, Unai Mendizabal eta Iñaki Gurrutxaga. Gai jartzailea Imanol Artola 'Felix' izango da.
Aurretik kanporaketa fasea gaindituta igaro dira finalera lau bertsolariak. Saio biziak osatu dituzte orain arte, eta are biziagoa izango da etzikoa, ariketek ere hori ahalbidetuko baitute. Honakoak dira bertsolariek osatu beharko dituzten lanak: hiruna bertso zortziko haundian, hiruna bertso zortziko txikian, puntu erantzunak, hiruna bertso seiko motzean eta bakarkako ariketa.
Lehenengo fase hori amaituta, puntuazio altuena duten bi bertsolariek buruz burukoa jokatuko dute. Bertan, ofizioa osatu beharko dute Iparragirre abila dela doinuan, hitza emanda bertso bat bota beharko dute hamarreko txikian, eta puntuka amaituko dute saioa.