Albokazale elkarteak antolatuta, II. Gipuzkoako Alboka Topaketa antolatu dute Hernanin. Asteburu honetan izango da topaketa, eta egitarau oparoa ondu dute albokarekin lotutako jarduerekin gozatzeko.
Hasteko, ostiralean Adar taldeak kontzertua eskainiko du Biteri Kultur Etxean. Arratsaldeko 19:30etan hasiko da musika emanaldia, eta larunbateko egun haundiaren preludioa izango da.
Izan ere, larunbatean iritsiko dira albokari gehienak Hernanira. Goizean hasiko dira motorrak berotzen, eta 11:30etan jarri dute hitzordua, albokariak, panderojoleak eta albokazaleak elkartzeko. Hernaniko udaletxeko arkupeetan bilduko dira kide guztiak, eta Kaxkoan barrena ibiliko dira ondoren, kale eta txoko guztiak musikarekin betetzen. Eguerdiko 13:00etatik aurrera, alboka musika saioak eta albokaren inguruko postuak ere izango dira Plaza Berrin.
Lanak ondo beteta, indarrak hartzeko ordua iritsiko zaie ondoren, 14:30ak aldera. Herri Bazkaria egingo dute Santa Barbara elkartean, eta sabelak bapo bete ondoren, azken kalejira egingo dute 18:00etan.