Hernaniko Udalak beste urte batez, arte sorkuntza sustatzeko dirulaguntza deialdia jarriko du martxan. Aurten 15.000 euro bideratuko ditu Hernaniko sortzaileei sorkuntza prozesuetan laguntzeko. Aurreko urtearekin alderatuta 5.000 euro gehiago bideratuko ditu.
Jada irekita behar zuen dirulaguntzak eskatzeko epeak, baina Gipuzkoako Aldizkari Ofizialeko argitalpenak akats bat zuenez, zuzenketa argitaratzen dutenean zabalduko da epea. Izan ere, aurtengo deialdian arte plastikoko proposamenek ere laguntza jasotzeko aukera izango dute.
Helburua, Hernaniko artistei sorkuntza prozesuetan laguntzea da. 2023ko deialdian, jarduera-proiektu horiek kultura edo sormen-sektoreren batean sartuta egon beharko dute: zinema eta ikus-entzunezkoak, argazkia, dantza, literatura, musika, antzerkia, arte plastikoa...
Dirulaguntza hau lor dezakete kultur eremuren batean diharduten edo hasi nahi duten pertsona fisikoek zein elkarteek.
Horretaz gain, eskatzaileak nahitaez egiaztatu beharko du, dirulaguntza eskatzeko datan, adin nagusikoa dela.