Igandean jokatu zuen Hernanik Ohorezko B Mailako bigarren partidua, Asturiasen. El Naranco zelaian jokatu zuten trikoloreek Real Oviedo taldearen aurka eta sekulako garaipena lortu zuten hernaniarrek: 9-46. Hernanik ederki hasi du denboraldia, aurreneko jardunaldian Getxo garaituta, eta hasierari segida eman diote, igandean Real Oviedo menderatuta. Trikoloreek bost puntu lortu zituzten igandean, eta une honetan, hirugarren postuan doaz, 9 punturekin.
Igandeko norgehiagoka, Oviedoren aldeko zigor kolpearekin hasi bazen ere, Xabier Lukasen ensaioarekin eta Beñat Arizetaren jaurtiketarekin, aurretik jarri zen Hernani hasieratik: 3-7. Aurreneko zatian, Oviedok beste sei puntu lortu zituen, bi zigor kolpearekin, baina ez zuen lortu Hernaniri aurrera hartzea. Izan ere, Hernanik 10 puntu lortu zituen (9-17) Beñat Arizetaren zigor kolpearekin, Aimar Gorrotxategiren ensaioarekin eta Arizetaren jaurtiketarekin.
Aurreneko zatia amaituta, atsedenaldiaren ostean, bigarren zatian sekulako erakustaldia eskaini zuten trikoloreek. 50garren minutuan, 3 puntu lortu zituzten Hernaniko gazteek Arizetaren zigor kolpeari esker, eta 56 minutuan Jokin Olanoren ensaioarekin markagailuan 5 puntu gehitzea lortu zuten: 9-25.
Bide beretik jarraitu zuen Hernanik, izan ere, zelai erdiko ostikoaren ostean Kepa Mijangos eta Anartz Elosegiren jokaldi ederrak entsegu berria ekarri zien (9-32). 66garren minutuan, berriz, Joseba Diaz de Mendibil harrobiko gazteak ensaioarekin eta Arizetaren jaurtiketarekin, 9-39 jarri zen Hernani. Azken minutuetan, Mijanos kapitainak, bigarren ensaioa lortu zuen jokaldi azkar batean, eta Arizetaren jaurtiketarekin, 9-46ko garaipenarekin itzuli ziren trikoloreak etxera.
23 urtez azpikoek, porrota
Larunbatean jokatu zuten 23 urtez azpikoek aurreneko jardunaldia, Altamiran, Moyua Goierri taldearen aurka eta 73-12 galdu zuten Hernaniko gazteek. Euskal Ligan berriz, 18 urtez azpikoek, 24-10 garaipena lortu zuten; eta 16 urtez azpikoek, ere Getxoren aurka neurtu zituzten indarrak Landaren, baina 43-05 galdu zuten.