Astearte honetan egingo du bilera Hernaniko Berdintasun Kontseiluak. Ikasturte berriko aurrenekoa izango da, eta Kulturarteko Plaza Feministan jarri dute hitzordua, arratsaldeko 17:00etan.Gogorarazi dute, herritar guztiei irekitako partehartze organoa dela Berdintasun Kontseilua, «berdintasunarekin lotura duten hainbat gairi buruz aritzeko. Kontseilu honetan proposatzen eta diseinatzen dira, herrian egiten diren hainbat ekimen eta ekitaldi».
Horregatik, Hernaniko Udaleko Berdintasun Sailak gonbitea luzatu die berdintasun gaietan interesa eta lan egiteko gogoa duten herritarrei, Berdintasun Kontseiluan parte hartu dezaten.
Hilean behin egin ohi dituzte bilerak, hileko bigarren asteartean hain juxtu.