Egun ederra izan zen atzokoa Hernaniko Zelabide auzoan. Arratsaldeko 18:00etan hasi ziren jaiak, eta festa giroa nagusitu zen ordutik aurrera. Holi Festak kolorez bete zuen Gabriel Zelaia plaza eta gustura aritu ziren jolasean haurrak eta gaztetxoak. Oihan Vega izan zen atzoko beste protagonistetako bat, dantzaldia egin zuten afaldu aurretik, eta musika saio ederraz gozatu zuten Zelabideko auzotarrek. Eguna amaitzeko, afalostean, Zezensuzkoaren txinpartek argitu zuten plaza.
Goizean hasiko dira gaurko jarduerak
Gaur ospatuko dute Zelabide auzoan festetako bigarren eta azken eguna. Egun osoan zehar hamaika ekintza antolatu dituzte, eta goizean goiz hasiko dira ingurua girotzen, 10:00etan dianarekin esnatuko baitira bizilagun guztiak.
Haurrei zuzendutako jarduera dexente izango dira gaur. 10:30etan Denontzat taldeak prestatutako zirkuitoa izango da atletismo pistan. Ondoren, 11:00etan, sokatira herrikoia antolatu dute Eper tabernako plazan. Bi jarduera horiek amaituta, eguerdiko 12:00etan, apar festa hasiko da Bidebieta plazan.
Gastronomiak ere tarte zabala izango du Zelabiden. Eguerdiko 12:00etan patata tortilla lehiaketa egingo dute, eta aldi berean hasiko da sagardo dastaketa. Aldiz, eguerdiko 14:00etan paella jate herrikoia izango da, arratsaldeko ekintzetarako indarrak hartzeko.
Bazkalostetik gauera, etenik gabe
Arratsaldetik aurrera iritsiko dira aurtengo festetako azken jarduerak. Jolasak eta txapelketak izango dira gehienak; tartean Mus Txapelketako finalak, Toka Txapelketa, giza futbolina edota gaztelu puzgarriak. Arratsaldeko 17:30etan atsedenaldi txiki bat izango dute gaztetxoek, eta txokolate beroa dastatzeko aukera izango dute Sagastialde elkartean.
Atzo Oihan Vegak egin zuen modura, gaurkoan DJ Pakok girotuko du ilunabarra eta gaua. Arratsaldeko 20:00etan umeentzat arituko da, eta 23:00ettaik aurrera parrandazaleek hartuko dute lekukoa. Dantzaldia amaitzerakoan, goizaldeko 02:00ak aldera, amaituko dira festak.
|
ZELABIDEKO JAIAK URRIAK 7, larunbata 10:00, Diana 10:30, Haurrentzako oztopo probak, Denontzat taldearen eskutik, atletismo pistan 11:00, Sokatira herrikoia, Eper tabernako plazan 12:00, Patata tortilla lehiaketa, Gabriel Zelaia plazan 12:00, Apar festa, Bidebietan 12:00, Sagardo dastaketa, Gabriel Zelaia plazan 14:00, Paella-jate herrikoia 15:30, Mus txapelketaren finalak, Gabriel Zelaia plazan 16:00, Gaztelu puzgarriak, Bidebieta plazan 16:00, Toka txapelketa, Eper tabernako plazan 17:00, Giza futbolina, Bidebietako futbol zelaian 17:30, Txokolatada, Sagastialde elkarteak antolatuta 18:00, Jaien aldeko bingoa 20:00-22:00, Umeentzako dantzaldia, DJ Pakorekin 20:30, Denok afaltzera, 23:00-02:00, Helduentzako dantzaldia, DJ Pakorekin 23:30, Zezensuzkoa 02:00, Jaien amaiera |
