2022ko San Joanetan txosna baimenik gabe jartzeagatik 3.000 euroko isuna jaso zuen Buruntzaldeko Kontseilu Sozialistak. Haatik, prentsa ohar baten bidez azaldu dutenez, Hernaniko Udaletik gutun berri bat jaso dute Kontseiluko kideek: «Gutunean adierazten da lehen jarri ziguten txosnaren harirako isuna iraungitzen utzi dutela. Alabaina, egoera horrela utzi beharrean, prozesu hori artxibatzearekin batera beste bat ireki digute, isun berri bat jarriz».
KStik salatu dute «auzia guztiz politikoa dela»: «Legea eta administrazioa baliatzen ari dira haien interes politikoen alde. Gainera, azken San Joanetan txosna jartzeko baimena izateak urte horretako erabaki arbitrarioa agerian uzten du».
Hernaniko Udalarekin kritiko agertu da Kontseilu Sozialista
Kontseilu Sozialistatik gogor kritikatu dute Hernaniko Udalaren jarduna: «Behin eta berriro eskubide politikoak auzitan jartzen ari da Udala, baita mugimendu jakin baten jarduna oztopatzen ere».
Gauzak horrela, isun berriaren «baliorik eza» nabarmendu dute: «Eskubide politikoen aldeko borrokan jarraituko dugula adierazten dugu».