Auzoko festa koloretsuetan koloretsuenak ospatuko dituzte asteburu honetan; bereziki, klasiko bilakatu dute Holi Fest bereziari esker. Ostiral honetan hasiko dira Zelabideko Jaiak, koloretako hauts ezagunak airera zabaltzearekin batera; eta larunbatekoa izango dute egun nagusia, Gabriel Zelaia eta Bidebieta plazen inguruko bizilagunek.
Bazterrak hauts koloretsuz bete ondoren, sabel-dantzak eta Jaixkipe txarangaren doinu alaiek piztuko dute jai-giroa auzoan, eta sardin-jatearekin borobilduko dute arratsaldea, dantzan hasi aurretik. Oihan Vega diskojartzailearen bisita izango dute horretarako, eta bi saio eskainiko ditu: aurrenekoa, 20:30etan hasita, gaztetxoentzat; eta bigarrena, 23:30etatik aurrera, adin guztietako herritarrentzat.
Bete-betea, larunbateko eguna
Ostiraleko beroketaren ondoren, festarako gogoz hasiko dute larunbata auzotarrek, eta horixe izango da jaietako egun nagusia, egitarau potentearekin.
Kirolari helduko diote aurrena, gaztetxoentzako oztopo probekin eta sokatira herrikoiarekin. Eta bi klasikok emango diote segida, eguerdian: sagardo dastaketak, eta patata tortilla lehiaketak. Apar festa ere izango da orduan, bazkalorduko paella-jatearen aurretik.
Eta arratsalderako, beste horrenbeste eta gehiago: mus txapelketaren finalak, gaztelu puzgarriak, toka txapelketa, giza futbolina, txokolatada, bingoa, dantzaldiak eta zezensuzkoa.
ZELABIDEKO JAIAK
URRIAK 6, ostirala
18:00, Txupinazoa eta Holi Fest, Gabriel Zelaia plazan
18:15, Sabel-dantza, Gabriel Zelaia plazan
18:30-20:30, Jaixkipe txaranga
19:30, Sardina dastaketa, Gabriel Zelaia plazan
20:30-22:00, Umeentzako dantzaldia, Oihan Vegarekin
20:30, Denok afaltzera, txosnan
23:30-02:00, Denontzat dantzaldia, Oihan Vegarekin
23:30, Zezensuzkoa
URRIAK 7, larunbata
10:00, Diana
10:30, Haurrentzako oztopo probak, atletismo pistan
11:00, Sokatira herrikoia, Eper tabernako plazan
12:00, Patata tortilla lehiaketa, Gabriel Zelaia plazan
12:00, Apar festa, Bidebietan
12:00, Sagardo dastaketa, Gabriel Zelaia plazan
14:00, Paella-jate herrikoia
15:30, Mus txapelketaren finalak, Gabriel Zelaia plazan
16:00, Gaztelu puzgarriak, Bidebieta plazan
16:00, Toka txapelketa, Eper tabernako plazan
17:00, Giza futbolina, Bidebietako futbol zelaian
17:30, Txokolatada, Sagastialde elkarteak antolatuta
18:00, Jaien aldeko bingoa
20:00-22:00, Umeentzako dantzaldia, DJ Pakorekin
20:30, Denok afaltzera, txosnan
23:00-02:00, Helduentzako dantzaldia, DJ Pakorekin
23:30, Zezensuzkoa
02:00, Jaien amaiera