URRITIK ABENDURAKO KULTUR PROGRAMAZIO OSOA IKUSTEKO, SAKATU HEMEN
Martxan da kultur ikasturtea Hernanin, eta ohi bezala, urritik abendurako programazioa aurkeztuta bota dute 'txupinazoa'. Atzo elkartu ziren horretarako, Biterin, Aitor Huizi kultur zinegotzia, Nagore Irastorza kultur teknikaria, Ainara Aiestaran liburutegiko arduraduna, eta Gaizka Izagirre eta Andres Daniel Sainz, Zineklubeko gidariak.
Hain juxtu, azkeneko hori da nobedadea, ikasturte berrian: «Bion ideia batetik abiatuta, behingoz errealitate izango da Zinekluba, Hernaniko Udalaren laguntzari esker. Helburu nagusia da zinemazaletasuna sustatzea Hernanin, eta zinemaren aitzakiarekin, bide batez, kultura indartzea. Ez dugu bilatu soilik pelikulak proiektatzea, baizik eta horren inguruan sortu daitezkeen elkarrizketak eta solasaldiak sustatzea. Filmen zuzendariak eta aktoreak ere ekarriko ditugu, edota pelikulek jorratutako gaietan adituak diren pertsonak, gai horien gainean aritzeko», azaldu dute.
Hilean behin izango dira saioak, eta nahi dute herritarrek «jauzi» egitea zinema proposamen guztien artean: zinema klasikoa, egile zinema, euskal zinema eta kalitatezko zinema komertziala. Tarteka, telesailek ere izango dute tokia, dokumentalak eskainiko dituzte, eta haurrentzako saio bereziak prestatuko dituzte. Hautaketa egiteko garaian, bi ardatz markatu dituzte: pelikulen erdia gutxienez euskeraz edo euskerazko azpitituluekin izatea (denak jarriko dituzte jatorrizko hizkuntzan); eta gutxienez erdia izatea, era berean, emakumezkoek zuzendutakoak. Lehenengo saioa, urriaren 18koa, doakoa izango da; eta gainerakoetan, 3 euroan izango da sarrera.
Kontzertu bereziak eta antzerki zikloa, azkeneko hiruhilekoan
Parekidetasuna bilatzea izan da, baita ere, urritik abendurako kultur programazioaren oinarrietako bat, diziplinen arteko orekarekin batera. Herriko musika taldeen ohiko emanaldiez gain, hiru kontzertu berezi izango dira urte bukaera bitarte: Don Inorrez taldearena urrian, Maria Berasarte eta Pepe Riverorena azaroan, eta Willis Drummond taldearena abenduan, 'Hala ere' biraren azkeneko emanaldietako bat, Biteriko harmailak kenduta.
Antzerki zikloak ere ez du hutsik egingo: azaroaren 28an, 29an eta abenduaren 1ean izango da (azaroaren 30erako Greba Feminista dago deituta). Eta literaturari dagokionez, bi berrikuntza: bata, Slawka Grabowskak gidatuko dituela gaztelaniazko literatur solasaldiak; eta bestea, ipuin kontaketak bi emanalditara bueltatuko direla, adinaren arabera banatuta.
Urriko emanaldietarako sarrerak dagoeneko salgai daude, Biterin eta kultura.hernani.eus atarian.