Festa giroak hartuko du protagonismoa Zikuñaga auzoan, bihartik igandera bitartean auzoko jaiak ospatuko baitituzte. Gainera, aurten, bigarren urtez, Zikuñagako Amaren ermitarekin batera ospatuko dituzte auzoko festa kuttunak. Bihartik igandera, hamaika jarduera burutuko dituzte umeentzat, gazteentzat zein helduentzat; horregatik, antolatzaileek auzotarrei eta herritarrei bertaratzeko deia luzatu diete: «Gonbidatuta zaudete auzoan ospatuko diren ekitaldi guztietara. Eta gogoan ditugu aurten falta direnak ere, ez ditugulako inoiz ahaztuko».
Bihar emango zaie hasiera Zikuñaga auzo jaiei, arratsaldeko 18:00etan botako duten txupinarekin. Segida emango diote festari buruhaundiek, eta arratsaldeko 19:00etarako, Ostomila txotxongilo taldeak hartuko du lekukoa auzoko txikiei emanaldi eder bat eskaintzeko. Zikuñagako auzotarrek gaueko 23:00ak arte atseden apur bat hartzeko tartea izango dute; izan ere, ordu horretan igoko da Laiotz taldea oholtzara, auzotarren gorputzak dantzan jartzeko aitzakia hartuz.
Etzirako ere egun osorako egitaraua prestatu dute, eguerditik gauera arte, hain justu. Eguerdiko 12:00etan, txikiek zilipurdika eta jolasean ibiltzeko aukera izango dute, puzgarriekin. 12:30etan tortila lehiaketako irabazlea iragarriko dute. Ondoren, sabelak beteta, egarriak asetzeko sagardo dastaketa baten bueltan bilduko dira auzotarrak eta ondorengoak izango dira sagardotegiak: Larre Gain, Otsua Enea, Zelaia, Petritegi, Oialume Zar, Altzueta, Itxas-buru eta Elorrabi. Arratsaldean, aparrak estaliko du Zikuñagako auzoa, eta 17:00etan, puzgarriak irekiko dituzte berriro, haurren gozamenerako. Festa giroari jarraipena emango dio Arraiketai txarangak 18:30etan, eta 20:00etan, berriz, danbor hotsek hartuko dute protagonismoa. Gauean, zezen suzkoak argituko du auzoa, eta jarraian musikarekin amaituko dute eguna, Matraka elektrotxarangarekin eta DJs TNTrekin.
Igandean meza, herri kirolak, bazkari herrikoia eta Rummi txapelketa
Zikuñagako Amaren omenezko mezarekin hasiko dute igandea, ermitan. Goizeko 10:00etan izango da hori eta autobus zerbitzua ere jarriko dute, auzotik ermitara igotzeko, eta ermitatik auzora jaisteko. Zikuñagako biribilguneko geltokitik ermitarako ordutegiak ondorengoak dira: 09:10, 09:25 eta 09:40. Aldiz, ermitatik auzora jaisteko: 11:00 eta 11:30.
Eguerdiko 12:00etan hasiko dira herri kirolak. Harria jasotzen izango dira Udane Ostolaza eta Imanol Lartain; eta aizkoran izango da Jose Mari Esnaola, Aratz eta Eneko semeekin. Eguerdiko 14:00etan hasiko da bazkari herrikoia, eta antolatzaileek adierazi dute bakoitzak bere bazkaria eraman beharko duela: «Mahaiak eta aulkiak guk eramango ditugu». Igandeari amaiera emateko, Rummi txapelketan parte hartzeko aukera izango dute auzotarrek, Auzozaintzak eta Auzo elkarteak elkarlanean antolatuta. Eta ohi moduan, amaierako trakarekin emango zaie bukaera auzoko festei.
ZIKUÑAGA AUZOKO JAIAK
HERNANI
BIHAR
18:00 Txupinazoa
Ondoren, Buruhaundiak
dultzaineroekin
19:00 Ostomila Txotxongilo taldea
Ondoren, txokolatada
23:00 Dantza Laiotz
taldearekin
ETZI
12:00-14:00 Puzgarriak
12:30 Tortila lehiaketa
Ondoren, Sagardo dastaketa
16:00 Apar festa
17:00-19:00 Puzgarriak
18:30 Arraiketa txaranga
20:00 Danborrada
23:00 Zezen suzkoa
Ondoren, Elektrotxaranga matraka
01:00, DJs TNT
IRAILAK 10
10:00 Zikuñagako Amaren omenezko meza ermitan
Ondoren, Ozenki abesbatza
Bukatzean, Erromeria eta
kalejira auzoraino txistulariak eta San Joan konpartsak lagunduta.
12:00 Herri kirolak
14:00 Bazkari herrikoia
Ondoren, Rummi txapelketa
Ondoren, Jaien amaiera trakarekin