Urteroko zitari eutsiz, udari amaiera ederra emateko aitzakia hartuta, Osiñagako auzo elkarteak egun pasa antolatu du, hilaren 17rako. Portugalete bisitatuko dute, eta irteera ordua, goizeko 09:00etarako jarri dute, Loiditik edota Bordaberritik. Hamaiketakoa bidean egingo dute, eta Portugaletera heltzean, bertako txokoak bisitatuko dituzte, besteak beste, ibai ertzean dagoen Alameda. Horrez gain, Bizkaiko meategi historikoen gunean, Zugastietan bazkalduko dute.
Autobusa eta izenematea
Autobusa Osiñagako auzo elkartearen kontura da, eta bazkaria aldiz, norberak ordainduko du. Horregatik, antolatzaileek azaldu dute bidaira joateko asmoa dutenek lehenbailehen auzo elkarteko komisioko kideren batekin jartzeko harremanetan. Izena emateko azken eguna irailaren 13a izango da, eta 649 493 920 zenbakira deituta eman daiteke izena.