Eguraldi txarrak baldintzatu zuen Latsunbeberri eta Marieluts auzoetako festetako larunbata. Bertan behera utzi behar izan zituzten kanpoan egitekoak ziren ekintzak, baina, karparen babesean, festa giroa mantentzea lortu zuten.
Goizean jokatu zituzten IX. Esku Pelota Txapelketako kanporaketa faseko partiduak. Normalean auzoko frontoia erabiltzen dute partiduak jokatzeko, baina aurtengo edizioko partiduak Kiroldegiko pelotalekuan jokatu zituzten. Gustura aritu ziren CD Hernaniko gaztetxoak, eta, lehiaz harago, giro onean jokatu zuten. Txapelketako finalak gaur jokatuko dituzte, goizeko 11:00etatik aurrera.
Euriak ez du gosea eteten; beraz, ahalik eta normaltasun haundienarekin egin zuten paella jana. Auzoko gazteak eta helduak elkartu ziren Latsunbeberriko kirol pistan, eta bingora jokatzeko tartea ere izan zuten bazkalostean. Arratsaldeko jarduera gehienak, aldiz, bertan behera geratu ziren.
Gastronomiari lotutako igandea izango da gaurkoa
Gaur izango da Latsunbeberriko eta Marielutseko jaien azken eguna, eta gastronomiarekin lotutako ekintzekin itxiko dute asteburuko egitaraua. Hasteko, patata tortila txapelketa egingo dute; 11:00etan hasiko dira partaideak sukaldeko lanetan, lehiakideek arrautzak, patata eta tipula bakarrik erabili ahal izango dituzte, eta 12:30etan jakinaraziko dute epaimahaikideek nor izan den irabazlea. Jokoan dauden sariak Latsunbe, Tranbia eta Karrero tabernetako afari txartelak dira.
Lehiaketaz gain, sagardo dastaketa ere izango da gaur, eguerdiko 12:30etatik aurrera; Altzueta, Rufino, Akarregi, Alberro, Elorrabi, Otsua-Enea, Gurutzeta, Oialume Zar, Zelaia eta Itxasburu sagardotegiek hartuko dute parte. Gainera, eguerdiko tarteak girotzeko, trikitilariak eta bertsolariak ere izango dira.
Kultur Bira ekimenak luzatuko du jaietako egitaraua
Latsunbeberriko eta Marielutseko jaiak gaur bukatzen diren arren, egutegia datorren ostiralera arte luzatuko da. Izan ere, Hernaniko Udalak antolatutako 'Kultur Bira' ekimenaren barruan, Kli Kla Birzikla txotxongiloek ikuskizuna eskainiko dute Latsunben. Arratsaldeko 19:00etan hasiko da saioa, eta txokolatada prestatuko dute txotxongiloen emanaldia bukatzen denean.