Gaur jokatuko dute Joxan Arabiotorre Txapelketaren zortzigarren edizioa, goizeko 10:00etan hasita, Zubipen. Emakumezkoen zortzi talde ariko dira, bi mailatan: seniorrak eta infantilak.
Euskal Ligako hiru talde ariko dira seniorretan, Hernani, Real Sociedad eta San Ignacio bilbotarra; eta Gipuzkoako selekzioa izango da laugarrena. Semifinaletan ekingo diote haiek, eta 45 minutuko partiduak jokatuko dituzte, atsedenik gabe. Horrela, Hernani eta Reala ariko dira aurreneko semifinalean, 10:30etan hasita; eta Gipuzkoako selekzioa eta San Ignacio bigarrenean, 11:30etan. Ondoren, hirugarren posturako partidua jokatuko dute bi galtzaileek, 12:30etan; eta ordubete beranduago izango da final haundia, 13:30etan.
Infantilek, berriz, ligaxka formatuan jokatuko dute txapelketa, denek denen kontra. Hori horrela, hiru partidu jokatuko ditu talde bakoitzak. 25 minutuko partiduak izango dira.
Goizeko 10:00etan ekingo diote, bi partidurekin: Hernani eta Urnieta batean, eta Mariño eta Intxaurdi bestean. Ondoren, 10:30etan hasita, Intxaurdi eta Urnieta ariko dira aurrez aurre; eta 11:15etan jokatuko dute Hernanik eta Mariñok. Eta ligaxka osatzeko, 12:00etan jokatuko dute Intxaurdik eta Hernanik elkarren kontra; eta 12:45etan izango da Urnietaren eta Mariñoren artekoa. Partidu guztiak kontutan hartuta, emaitza onenak lortzen dituen taldea izango da txapeldun.
Joan den urtean, senior mailako finalera sailkatu zen Hernani, baina galdu egin zuen Gipuzkoako selekzioaren kontra (0-1). Reala izan zen hirugarren, eta Osasuna laugarren. Infantiletan, berriz, Osasuna C nagusitu zen iaz, Añorgaren, Eibarren eta Hernaniren aurretik.