Larunbat arratsaldean jokatuko dute Barrenetxea IV.k eta Juaneneak Buruz Buruko Eusko Label Txapelketako finalerdiko partidua. Astelehen arratsaldean egin zuten bi erremontariek material hautaketa, eta argi geratu zen zein den bakoitzaren planteamendua.
Barrenetxea izan zen materiala hautatzen lehenengoa. Hernaniarrak hiru pelota bizi aukeratu zituen, partiduaren erritmoa azkartzeko asmotan: «Nire materiala askoz ere biziagoa da. Erosoago sentitzen naiz halako pelotekin sakean zein peloteoan, uste dut buruz burukoan arriskutsua dela tantoak gehiegi luzatzea. Ongi ezagutzen dugu elkar, eta ideia argiekin etorri gara materialaren bila».
Juaneneak pelota pisutsuagoak hartu zituen finalerdirako, eta adierazi zuen gustura geratu zela materialarekin: «Pelota arinagoak aukeratzeko asmoa nuen, baina Endikak hiru pelota bizi hartu dituela ikusita, motelagoak hautatzea erabaki dut. Bakoitzak bere interesen aldeko estrategia egin du».
Finalerako txartela jokoan
Partidu bakarrera jokatuko dute bi erremontariek irailaren 9ko finalerako txartela. Barrenetxeak 30-20 galdu zuen ligaxkako azken partidua, baina konfiantzaz gainezka dagoela nabarmendu du hernaniarrak: «Finala jokatu dudan edizio guztietan sailkatu naiz finalerdia jokatuta, ohituta nago jada. Juaneneak sekulako jokoa egiten du buruz burukoan, baina ni ere ondo iritsiko naiz». Juanenearen eta Barrenetxearen arteko partidua hernaniarrak irabazi zuen ligaxkan, eta horri buelta emateko intentzioa dauka Saldiasko erremontariak: «Zaila izango da, baina gogo haundia daukat. Hankako lesiotik guztiz osatzea lortu dut, eta iruditzen zait jokoa aldatu eta zertxobait arriskatuz gero aukerak izango ditudala».