Eskubaloi entrenatzaileen puntako topaleku izan zen Hernaniko Biteri kultur etxea, joan den larunbatean. Izan ere, hitzaldia eskaini zuen bertan Jordi Riberak, gizonezkoen Espainiako selekzioaren hautatzaileak. Haren sekretuak ezagutzera gerturatu ziren Euskal Herri osoko 50 entrenatzaile inguru.
Riberak aditzera eman zituen selekzioaren partiduak prestatzeko garaian egin ohi duen azterketa sakonaren nondik norakoak, honako atal guztiak landuz: taldeko jokalarien ezaugarriak, jokatu duten denbora, estrategia ezberdinak kontrako taldearen jokatzeko eraren arabera, estrategia mota bakoitzak aurreko partiduetan eman izan dizkien emaitzak...
Galderak egiteko aukera ere izan zuten bertaratuek, eta gustura atera ziren aretotik, Riberaren hitzaldia bukatutakoan.
Hernaniko Eskubaloi Taldeak antolatu zuen hitzaldia, eta jasotako erantzunaren «oso balorazio positiboa» egin du. Hori horrela, hurrengo ekintza ere hasi dira antolatzen dagoeneko, jakinarazi dutenez.