Urrian izango da bueltan Hernaniko Bakailu Astea, bere 11garren edizioarekin. Zehazki, hilaren 9tik 20ra bitartean izango da. Eta ekintzen artean, ez du hutsik egingo jende gehien erakartzen duenak: tabernen arteko bakailu pintxoen lehiaketak.
Aurreko urtean bezala, gainera, bi lehiaketa izango dira: batetik, pintxo lehiaketa herrikoia, herritarrek euren botoekin aukeratuta; eta bestetik, pintxo lehiaketa profesionala. Azkeneko horretan, urriaren 5ean dastatuko dituzte pintxo guztiak epaimahaikide profesionalek, eta pintxorik onena aukeratuko dute, Bakailu Astearen bukaeran iragarriko dutena.
Tabernen izenematea, abuztuaren 31ra arte
Pintxo lehiaketan parte hartu nahi duten tabernek, aldez aurretik eman behar dute izena. Horretarako epea zabalik dago, abuztuaren 31ra arte: mezua idatzi behar dute merkataritza@hernani.eus helbide elektronikora, edo deitu 943 33 70 35 telefono zenbakira. Joan den urtean, 24 tabernak hartu zuten parte pintxo lehiaketan.