Oso sendo jarraitzen du Endika Barrenetxea hernaniarrak, Buruz Buruko Txapelketan; eta pauso haundia eman zuen larunbatean, zuzenean finalera sailkatzeko: Aritz Juaneneari 26-17 irabazten ari zela, min hartuta partidua utzi behar izan zuen saldiastarrak. Hortaz, 30-17 irabazita, ligaxkaren sailkapeneko buru da hernaniarra, 8 punturekin. Hori horrela, nahikoa du azkeneko jardunaldian bi puntu lortzea: Javier Urrizari 27 tanto egitea, alegia.
Nagusi izan zen Barrenetxea, hasieran bereziki: sakea baliatuz jaun eta jabe izan zen, eta 10-1 egin zuen ihes. Sakeari atzetik erantzunda aurkitu zuen soluzioa Juaneneak, eta berdindu egin zen partidua pixkanaka, 17-13 jartzeraino. Baina berriro egin zuen ihes hernaniarrak (21-13 eta 25-16). Orduan, errestotik tanto bat lortu zuen saldiastarrak, baina tiroia nabaritu zuen izterrean, eta hurrengo tantoan utzi behar izan zuen partidua.
Juanenearen lesioak ateak ireki dizkio Urrizari, txapelketan aurrera egiteko. Saldiastarrak Ansaren kontra jokatzerik ez balu, puntu bat galduko luke; eta Urriza semifinaletara sailkatuko litzateke irabaziz gero.