Estropada bat ez, bi izango ditu Hernaniko Maialen traineruak, asteburu honetan, ETE Ligan. Zarautzen jokatuko du aurrenekoa gaur, goizeko 11:15etan hasita. Lau traineruko bi txandatan ariko dira, eta Astillero, Ondarroa eta Portugaleterekin ariko da Hernani, aurrenekoan. Bihar, berriz, bakarkako erlojupeko proba izango dute Bilbon, arratsaldeko 17:00etan hasita. Nerbioi ibaian jokatuko da estropada, Deustuko zubiaren eta udaletxeko zubiaren artean, gutxi gorabehera. Zazpigarren dago Hernani ETE Ligako sailkapen nagusian, 23 punturekin; eta urruti xamar dauka Ondarroa seigarrena (30 puntu). Dena den, azkeneko hiru estropadetatik bitan lortu du traineru bizkaitarra gainditzea, seigarren postua eskuratuta. Horretan saiatuko dira gaur eta bihar ere.