Estropada bat ez, bi izango ditu Hernaniko Maialen traineruak, datorren asteburuan, ETE Ligan. Zarautzen jokatuko du aurrenekoa, larunbatean, goizeko 11:15etan hasita. Lau traineruko bi txandatan ariko dira, eta bi luze osatu beharko dituzte. Astillero, Ondarroa eta Portugaleterekin ariko da Hernani, aurreneko txandan. Igandean, berriz, bakarkako erlojupeko proba izango dute Bilbon, arratsaldeko 17:00etan hasita. Nerbioi ibaian jokatuko da estropada, Deustuko zubiaren eta udaletxeko zubiaren artean, gutxi gorabehera.
Zazpigarren dago Hernani, ETE Ligako sailkapen nagusian, 23 punturekin; eta urruti xamar dauka Ondarroa seigarrena (30 puntu). Dena den, azkeneko hiru estropadetatik bitan lortu du traineru bizkaitarra gainditzea, seigarren postua eskuratuta.