Udako ekintzek jarraipena izango dute abuztuan. Hernaniko Udalak aste honetan aurkeztu du 65 urtetik gorako pertsonei zuzendutako jarduera programa, eta hiru ekintza izango dituzte. Ekintza hauekin Udalaren helburua da «gazteek eta haurrek bezala, adinekoek ere sozializatzeko, parte hartzeko eta ondo pasatzeko gune bat izatea».
Abuztuko agendan 'Hernani ezagutu' eguna izango da lehenengoa. Abuztuaren 16an egingo dute bisita gidatua, eta Hernaniko barrunbeak ezagutzeko aukera izango dute. Gainera, egun horretan bertan eman beharko da izena gainontzeko ekintzetarako, plaza mugatuak izango baitira.
Abuztuaren 23an izango da bigarren saioa, mahai jokoekin eta bingoarekin. Bertan gehiago sozializatzeko aukera izango dute adinekoek. Azkenik, abuztuaren 30an egingo dute itxiera saioa, oraingoz argitaratu gabe dagoen jarduera berezi batekin.
Saio guztiak asteazkenetan izango dira, goizeko 10:00etatik 12:00etara, Atsegindegin.