Astearte arratsaldean aurkeztu zuten, Chillida Leku museoko eskulturen artean, urteko erremonte txapelketa garrantzitsuena; Buruz Buruko Eusko Label Txapelketa. Momentuko erremontari onenak nor baino nor arituko dira txapelketa honetan, irailaren 9ko finalean txapela janzteko asmoarekin. Bertan izan ziren Chillida Lekuko eta Oriamendi 2010 enpresako ordezkariak, eta kirolariei harrera egiteaz gain, txapelketaren garrantzia nabarmendu zuen Xabier Gonzalezek: «Urteko txapelketa garrantzitsuena da. Zorionez ez daukagu bajarik, eta onenek jokatuko dute».
Txapelketa uztailaren 18an abiatu zen, lehenengo faseko partiduekin. Iazko txapelketako emaitzen arabera sartu dira erremontariak jokoan, eta lehenengo fasetik Larrañagak lortu zuen Aurreligaxkara igarotzea. Azkoitiarrak 30-22 irabazi zuen Eskuderoren aurka, 29-30 Martirenaren aurka, eta 22-30 Goikoetxea V.ren kontra.
Gaur bertan hasiko da Buruz Buruko Eusko Label Txapelketara sailkatzeko Aurreligaxka. Larrañaga eta Azpiroz arituko dira buruz buru, hurrengo partidurako txartela lortzeko. Irabazten duen erremontariak larunbatean jokatuko du partidu erabakigarria, Juanenearen kontra.
Hortxe amaituko dira koplak. Izan ere, larunbateko partidua irabazten duenak Ligaxka jokatzeko ohorea izango du, momentuko hiru erremontari onenekin batera. Jada zain daude Urriza, Barrenetxea IV eta Ansa II, aurreko urteko lehenengo hiru sailkatuak. Ligaxkak sei jardunaldi izango ditu, pelotari guztiek elkarren aurka jokatu beharko dute, eta ohiko puntuaketa sistema erabiliko dute sailkapenak egiteko; 30 tantora iristen den erremontariak, hau da, garaileak, 4 puntu batuko ditu; 29tik 27 tantora egiten dituenak 2 puntu jasoko ditu; 26 eta 24 artean geratzen denak puntu bakarra gehituko du; 23 eta 17 tanto artean egiten dituenak ez du punturik batuko; eta 16 baino gutxiago egiten dituenari puntu bat kenduko zaio. Fase honetan azkena geratzen den pelotaria txapelketatik kanpo geratuko da.
Irailerako geratuko dira jardunaldi garrantzitsuenak. Ligaxkan bigarren eta hirugarren postuan sailkatzen diren bi erremontarien artean finalaurreko partidua jokatuko dute, kale edo bale. 30 tantura jokatuko dute partidua, iraileko lehenengo larunbatean. Azkenik, irailaren 9an jokatuko dute final haundia. Ligaxkako lehenengo sailkatuaren eta finalaurreko partidua irabazten duen pelotariaren arteko lehia izango da Galarretan.
Aurtengo txapelketan garaikurra mantentzen saiatuko da Urriza, iazko mailari eutsiz. Hala ere, ez du lan erraza izango aurrelari nafarrak, Ansa IIren eta Barrenetxea IVren konpetentziarekin, batik bat.
BURUZ BURUKO TXAPELKETAGALARRETA
Abuztuak 3 Abuztuak 5 LIGAXKA Abuztuak 10, 12, 17, 19, 24, 26 *Erremontari guztiek elkarren aurka jokatuko dute. FINALAURREA Irailak 2 FINALA Irailak 9 |