Denboraldi betean daude arraunlariak, eta bi estropada izango dituzte asteburu honetan 'Maialen' traineruko kideek. Lehenengoa larunbatean izango da, Sestaon, goizeko 11:00etan; 2.778 metroko proba osatu beharko dute Bizkaiko estropadan. Bigarrena, berriz, Astilleron izango da, igandean, goizeko 10:00etan; XXIX. Astilleroko Bandera.
Portugaleten egindako lanarekin, gustura
Aurreko igandean Portugaleteko XLI. Banderan aritu ziren hernaniarrak, eta emaitza borobiltzea lortu ez zuten arren, arraunlarien bilakaerarekin pozik agertu zen Asier Ocon entrenatzailea: «Sailkapenean aurretik ditugun traineruetara hurbiltzen ari gara. Hala ere, ondo egindako lana errematatzea falta zaigu. Pozik gaude, gaztetasunak eragiten du, baina estropadaz eztropada ikasten ari dira, eta paladaz palada gorantz egin nahi dute».