Gaur arratsaldean, Endika Barrenetxea hernaniarrak eta Juaneneak aurrez aurre izango dituzte Segurola eta Ansa II, Jai Alai Summer Season txapelketako finalerdian. Ohi bezala, arratsaldeko 16:30etan hasiko da jaialdia Galarretan, eta bigarren partidua izango da finalerdia.
Joan den asteburuan amaitu zen Jai Alai Summer Season txapelketako ligaxka, eta ezustekoa izan zen Galarretan. Izan ere, Azpirozek eta Larrañagak 1-2 irabazi zieten Barrenetxeari eta Juaneneari. Segurolak eta Ansak, berriz, galdu egin zuten Aldaberen eta Urrizaren aurka. Irabazita ere, txapelketatik kanpo geratu ziren Aldabe eta Urriza, eta aurreneko postua eskuratu zuten Azpirozek eta Larrañagak, zuzenean finalera sailkatzeko. Hori horrela, finalerdian ariko dira beste bi bikoteak, finalerako bigarren txartelaren bila. Asteartean aukeratu zituzten finalerdirako pelotak, eta agerian utzi zuten estrategia bi bikoteek: jokoa azkartzen saiatuko dira Barrenetxea eta Juanenea, eta moteltzen Segurola eta Ansa.
Aitor Aiestaranek finala, etzi
Larunbatean jokatuko da txapelketa nagusiko finala, eta baita B multzokoa ere. Horretan ariko da Aitor Aiestaran hernaniarra, Loitegirekin batera, Zaldua IIren eta Eskuderoren kontra.