Bere bigarren nobela argitaratu du Urki Ruizola idazle hernaniarrak: Pistolera nobelaren jarraipena. Círculo de venganza izenekoa da nobelaren bigarren atala, eta aurrenekoak bezala, western giroa, kapitulu motzak eta erritmo azkarreko irakurketa ditu ezaugarri nagusi.
Gainera, Alai Zubimendi hernaniarrak egin du liburuaren azala, eta Gaueko komiki dendan dago nobela salgai.
Mendekua izango du erdigunean nobelak. Ramsayk ikusi zuen, izenik gabeko pistolariak nola hil zuen bere aita; eta ordutik, mendekuarekin obsesionatuta hazi da. Ziur dago pistolaria bizirik dagoela oraindik, eta horregatik, haren bila abiatuko da, bere aginduetara daukan hiltzaile talde batekin. Iraganeko eta etorkizuneko pertsonaiek elkarbiziko dute mendekuaren zirkuluan. «Espero dut irakurtzen gozatuko duzuela, nik idazten gozatu dudan bezainbeste», adierazi du idazleak, nobelaren aurkezpen laburrean.
Uno Editorial argitaletxearen eskutik argitaratu ditu bi nobelak hernaniarrak, eta bere webgunean (unoeditorial.com) dago eskuragarri horiei buruzko informazio guztia.