Joan den larunbatean jokatu zuten aire libreko Euskadiko Txapelketa, 16 urtetik beherakoen mailan, Gasteizko Mendizorrotzako atletismo pista berrituan. Eta bertan izan zen, bere denboraldi bikainari erremate ezin hobea jartzeko, Lur Ocon Arreitunandia atleta hernaniarra: Euskadiko txapeldun izan zen, 1.500 metroko oztopo proba irabazita.
4:47,50 denboran osatu zuen proba hernaniarrak, eta nagusitasunez menderatu zituen lehiakideak, ia zortzi segunduren aldearekin. Ekhi Civico tolosarrak (4:55,11) eta Lander Lanzos arrasatearrak (4:55,14) osatu zuten podiuma.
Sasoiko dabil hernaniarra, aire libreko denboraldian. 1.500 metroko oztopo proba irabazi zuen Ordizian ekainean, Gipuzkoako Txapelketan hirugarren izan zen 1.000 metroko proban, eta 16 urtez azpiko Espainiako Txapelketarako minima lortu du proba berean.