Ohikoa da, uda iristearekin batera, odol erreserbek behera egitea, eta horrekin batera, baita egunerokoan sortzen diren beharrei erantzuteko gaitasuna ere. Horregatik, dei berezia luzatu dute Hernaniko Odol Emaileen Elkartetik, hileroko hitzorduari eutsi eta estrakzioetara gerturatzeko.
Gaur izango da uztaileko zita Hernanin, eta arratsaldeko 17:00etatik 20:40etara egingo dituzte estrakzioak, anbulatorioko aretoan. Horretarako, ohikoa den bezala, aldez aurretik eskatu beharko da hitzordua telefonoz. Gaur goizean zehar deitu beharko da 943 00 78 84 telefonora, eta ordua hartu. Odolaren beharraz ohartarazi, eta gaurkoan zita hartzera animatu ditu herritar guztiak, Hernaniko Odol Emaileen Elkarteak.