Gazteekin eta haurrekin egin bezala, 65 urtetik gorako pertsonei zuzendutako jarduera programa aurkeztu du Hernaniko Udalak. Guztira lau ekintza prestatu ditu, uztailean zehar egingo dituztenak; eta helburua adinekoek sozializatzeko, parte hartzeko eta ondo pasatzeko gune bat izatea da.
Lehenengo ekintza asteazken honetan egingo dute, Ave Maria parkean paseoa egin eta kanpoko igerilekua bisitatuta; bigarren ekintza belaunaldien artekotasuna sustatzeko saioa izango da, udalekuetako haurrekin batera egingo dutena; hirugarrena mahai joko eta bingo saioa; eta, azkenik, zinearekin amaituko dute ekitaldi zikloa.
Jarduerak uztaileko asteazkenetan izango dira, goizeko 10:00etatik eguerdiko 12:00etara, eta parte hartzeko ez da beharrezkoa izango aurrez izena ematea.