Asteburu gozoa izan da Hernaniko arraunlarientzat, modalitate eta txapelketa ezberdinetan. Traineru denboraldiari dagokionez, ETE Ligan beste aurrerapauso bat eman zuen Hernaniko Maialen traineruak, eta seigarren izan zen Mundakan, Zarautzen eta Portugaleteren aurretik, orain arteko posturik onena lortuz.
Postua bera baino garrantzitsuagoa izan zen, ordea, aurrekoetatik gero eta gertuago dagoela ikustea. 12:59 denboran osatu zuten proba hernaniarrek, eta oso gertu izan zituzten aurreko hirurak: Deusto-Bilbo hirugarrena (12:47), Astillero laugarrena (12:50) eta Ondarroa bosgarrena (12:56). San Juan Bandera izango dute larunbat honetan, Pasaian, arratsaldeko 17:00etan hasita.
Espainiako Txapelketan brontzezko domina, Uraldek eta Odriozolak
Bestalde, Espainiako Txapelketa jokatu zen Kataluniako Banyolesen, eta bi hernaniar aritu dira bertan: Unax Uralde Alcoba eta Beñat Odriozola Aranburu. Eta parte hartu bakarrik ez, brontzezko dominarekin bueltatu dira biak. Kadete mailan, lau arraunlariko ontzian (4 scull) lortu zuen hirugarren postua Uraldek, Orioko Arraun Elkartearekin; eta arraun egokituan, bakarka (skiff) izan zen hirugarren Odriozola, Hernaniko Arraun Elkarteko kidea.