Koadrilen egun haundia da gaur, eta hori ospatzeko, brindisa egingo dute, 13:00etan, Gudarien Plazan. Eztarriak goxatuko dituzte koadrilek, poteoan, bazkariaren aurretik eta gazteak Tilosetan elkartuko dira. Aurretik, ordea, aurreneko sokamuturran elkartuko dira gaua luzatu dutenak eta lehenengo eguzki printzekin esnatu direnak. Axeri Dantzarekin bizkarrak gorritzeko aukera izango da ondoren. Era berean, txarangak, umeentzako ikuskizunak eta kontzertuak ere izango dira.
Atsegindegin haurrentzako parkea 10:00etan irekiko da. Adabaki klown ikuskizuna arratsaldeko 17:00etan hasiko da Urbieta kalean. Ordu erdi geroago, estreinekoz, Loratuz Loratukoek Harrotasun aldarrikapen karroza aterako dute Kaxkoan zehar. Aurten bai, Revuelta anaiek Fermin Valenciaren konpainia izango dute musika emanaldian. Azkenik, dantzaldiak eta erromeriak, txarangarekin itxiko dute eguna.
San Joan egun argitsua
Atzoko San Joan egunez, musika izan zen protagonista zalantzarik gabe. Dianarekin hasita, danborrada, Musika eta Txistulari banden kontzertuak eskaini ziren goiz-eguerdian zehar. Dantzak ere izan zuen lekua, modernoak Jennyrekin aerorumban eta tradizioari eutsiz dantza sueltoko txapelketa. Eta gauean jendetza izan zen.