Beñat Segurolak eta Aritz Juaneneak irabazi dute Sagardoaren Txapelketa, Bereziartua sagardotegiaren izenean. Final estuan, hiru setetan nagusitu ziren astelehenean, Alorreneako Javier Urrizaren eta Ibai Martirenaren kontra: 11-15, 15-10 eta 2-5.
Partidu luzean, urdinak hobeto iritsi ziren azkeneko tantoetara, eta oso sendo aritu ziren biak. Gorriek, aldiz, pelota aukeraketan egin zuten huts, beharbada: hautatutako pelota moteletara ezin egokitu aritu zen Martirena, eta nekatu egin zen Urriza, azkeneko tantoetan frexkotasun falta nabarituz.
Urrizaren joko erasokorrari esker, 5-1 aurreratu ziren gorriak aurreneko setean, eta alde horri eutsi zioten ia bukaerara arte (11-7); baina 0-8ko partzialarekin, jokoa irauli zuten urdinek, iruindarrak egindako 9 tantoak ezerezean utziz. Bereziki ondo aritu zen Juanenea, set horretan.
Berdintsu hasi zen bigarren seta, gorriak 9-3 aurreratuta; eta oraingoan bai, bukaerara arte eutsi zioten aldeari (15-10), Urrizaren beste 9 tantorekin. Horrela, partidua berdindu eta desenpatea behartu zuten gorriek.
Baina joko erabakigarriari, indartsuago ekin zioten urdinek, eta 1-3 aurreratu ziren berehala, Segurolaren hiru tantori esker. Jokoa bideratuta, ez zuten hutsik egin, eta beraiek jantzi zuten txapela, Juaneneak egindako tanto batekin.
Urrizak jaso zuen txapelketako jokalari onenaren saria.