Heldu da eguna, gaur ospatuko da Jaialdi gastronomikoa, AMHERren eskutik. Eguerdiko 12:00etan emango zaio hasiera jaialdiari, Atsegindegin eta bi orduko tartea izango dute herritarrek, herrialde ezberdinetako jakiak dastatzeko. Jaialdia baino lehenago, sukaldaritza tailerra ere antolatu dute Santa Barbara elkartean 10:00etan, gazteentzat.
Jaialdi gastronomikoan Hernaniko, Ertamerikako eta Hego Amerikako, Afrikako eta Asiako plater goxoenak probatu daitezke. Guztira, hogeiren bat herrialdetakoak: Argentina, Bolivia, Kolonbia, Venezuela, Kuba, Txile, Peru, Paraguay, Honduras, Nikaragua, Mexico eta Dominikar Errepublikakoak; Nigeria, Senegal, Aljeria, Maroko eta Mendebaldeko Saharakoak; Mongoliakoak... Ondorengo plater ederrak dastatzeko aukera izango dute bertaratzen direnek, besteak beste; 'chicha morada’ eta ‘papa a la huancaina’ (Peru); Kipe (Dominikar Errepublika); ‘arkumea kuskusarekin’, Mongoliako ‘tortelini’; ‘farsi’ (Senegal); ‘baleadas’, ‘nacatamal’, ‘arepa’ eta ‘empanada venezolana’, ‘buñuelos y papas chorreadas’ (Kolonbia); eta patata eta bakailao tortilak, antxoak errebozatuta, gazta menbriloarekin, Euskal Herrikoak.
Kulturen arteko ezagutza bultzatzeko eta harremanak egiteko aukera paregabea izango dute herritarrek gaurkoan. Amaitzeko antolatzaileek ondorengoa adierazi dute: «eskerrik asko Iparragirre sagardotegiari sagardoa emateagatik; eta aurrez eskerrak datozen guztiei».