Ricardo Crespok, udal talde sozialistaren bozeramaileak, Hernaniko Udaleko idazkariari txosten bat egin dezala eskatu dio, «udal instalazioetan izandako eraso arin baten kasuan emandako pausoei buruz». Hernaniko PSE-EEren udal taldeak erregistratu zuen eskaera, «jakiteko Udalak zergatik ez zituen bideo grabazioak aurkeztu epaiketa batean». Bozeramaileen batzordea aurreko asteko ostiralean egin zuten, gaia eztabaidatu ahal izateko, eta orain espedientearen zain daude erabakiren bat hartzeko.
Ohar baten bidez, «eraso arin bat jasan zuen Hernaniko emakumeari elkartasuna» adierazi ondoren, PSE-EEk «oso larritzat» jo du Udalak «epaiketan bideo-grabazioak ez erraztea, eta aldiz aurkeztutako udal txosten batean honako hau adieraztea: ...gune horretan kamerak egon arren, ...ez zen inolako erorikorik ikusi. Magistratu baten eskuhartzeak behartu du EH Bilduko udal gobernua gertakariak argitzen dituzten bideo-frogak erraztera».
Honakoa adierazi du bozeramaile sozialistak: «Udalaren betebeharra da langile guztien defentsa egitea errugabeak diren bitartean, baina ez dugu ulertzen gertatutakoa argitzeko frogak hasieratik aurkeztu ez izana, epaile batek eskatu beharrik izan gabe». Eta gaineratu du: «Udalaren betebeharra ere bada herritarrak edozein eraso egoeratatik defendatzea, eta gertatutakoa argitzen laguntzea. Oso kezkagarria da EH Bilduk frogak ezkutatzea prozesu judizial batean». PSE-EEren iritziz, «Udalak irudi horiek eman izan balitu, berak zaintzen baitzituen, emaitza aldatu zitekeen».
Hernaniko alderdi sozialistak galdetu du ea «hori den EH Bilduk edozein eraso mota gertatzen denean duen jokabidea. Horrela bada, ez gaude seguru gobernatzen gaituztenekin. Zergatik ez dira eman irudi horiek hasiera-hasieratik, zein da arrazoia? EH Bilduk erabaki dezake zein diren baliozko frogak eta zein ez?».
Ricardo Crespo bozeramaile sozialistaren ustez, «gobernu taldea gaitzetsi beharko litzateke bere jarreragatik, eta kargugabetu beharko litzateke frogak epaiketara ez aurkezteko erabakia hartu zuen arduradun politikoa. Gogorra izan da herritar bat ikustea, hernaniar bat, sufritzen eta babesik gabe sentitzen».