Gaur hasiko dira ofizialki Osiñagako Jaiak, eguerdiko txupinazoarekin. Hala ere, urtero bezala, pasa den astean egin zuten egitarauko lehenengo ekitaldia. Bertso afaria antolatu zuten Itxas-Buru sagardotegian, auzoko festen preludio gisa.
Bertan aritu ziren Joanes Illarregi eta Eñaut Martikorena bertsolariak. Librean osatu zuten saioa bertsolari gazteek, eta biek erakutsi zuten maila txukuna; erritmo bizian osatu baitzuten saio osoa. 80 pertsonatik gora elkartu ziren Itxas-Burun, eta oso gustura geratu ziren guztiak.
Bertsolaritzaz gozatzeko aukera dago oraindik
Osiñagako Jaietan beti du tarte berezia bertsolaritzak, eta aurten ere ez dute hutsik egin. Gaur bertan Bertso Eskolako Janitz Nazabal, Iker Ormazabal 'Tturko', Ekain Tolaretxipi eta Harri Agirresarobe gazteak arituko dira kantuan, herri kirolen ondoren. Auzoko kirolarien arteko lehian gertatzen direnak aletuko dituzte kantuan.
Bihar, aldiz, Unai Agirrek eta Aitor Mendiluzek hartuko dute lekukoa, eta bi saio egingo dituzte: lehena eguerdiko 13:00etan, eta bigarrena arratsaldean, Artolaren eta Telleriaren idien arteko dema amaitzen denean.