Larunbatean jokatu ziren boleibol kantxako 2022-2023 denboraldiko azken partiduak. Orokorrean emaitza txukunak lortu dituzte Hernaniko taldeek, eta zenbait sari ere eskuratu dituzte jokatutako finaletan.
Lorpen nagusia infantil neskek lortu zuten; Gipuzkoako txapeldunak izan dira, eta Eusko Jokoetan parte hartuko dute larunbat honetan, ekainaren 3an, Urretxu-Zumarragan. Infantil mailako mutilak eta kadete mailako neskak, aldiz, azpitxapeldun geratu dira Gipuzkoako txapelketan.
Neskek Aldapetaren aurka jokatu zuten, eta 1-0 aurreratzea lortu zuten. Ondoren, 2-0 lortzeko zorian zeuden, baina donostiarrek 1-1 berdintzea lortu zuten, eta behera egin zuen Hernanik. Azken emaitza 1-3 izan zen, eta txapeldunordearen saria jaso zuen Hernanik.
Kadete mutilek erraz irabazi zuten denboraldiko azken partidua Salbatore Mitxelena Zarautz taldearen aurka (3-0), eta postu bikainean amaitu dute denboraldia. Adin bereko taldeen artean lehenengoak geratu dira hernaniarrak. Orain atseden hartzeko tartea izango dute jokalariek, eta hurrengo denboraldia prestatzen hasiko dira klubeko kideak.