Mendekoste jaiak ostiralean hasi ziren Florida-Etxeberrin eta atzo bizi izan zuten egun haundia giro ezin hobean. Jende asko bildu zen goizean goiz hasita eta egun guztian zehar, programako ekitaldi guztietan izan zen jendetza. Dudarik gabe, eguraldi onak asko lagundu zuen.
Hala ere, festa ez da amaitu eta gaur izango du segida, baina lasaiagoa izango da jaien azkeneko eguna. 11:00etan hasiko dute, hildakoen aldeko mezarekin; eta sagardo dastaketak erakarriko du jendea auzora, eguerdian.
Gainera, dastaketak iraun bitartean, Interjaiak sukaldaritza lehiaketaren bigarren edizioa egingo dute, eta osagai sekretuekin egin beharko dute lan sukaldariek. 14:30etan emango diete bukaera jaiei, azkeneko traka lehertzearekin batera, datorren urtera arte.