Kultur Birako hiru ekitaldi burutu dira dagoeneko maiatzean, eta hilari amaiera emateko, bihar arratsaldean 'Zirkoteke' zirkuaz gozatzeko aukera izango dute herritarrek. Arratsaldeko 16:30etan hasiko da emanaldia, Karabelen, eta 55 minutuko iraupena izango du. Imitaezina eta energiaz topera iritsiko da Zirkoteke, erritmo haundiarekin, sormenarekin eta hamaika gorabeherarekin desgaitasunez, nork bere mugak gainditzeaz eta ezberdinen arteko lankidetzaz hitz egiteko: «Utzi eramaten eta ohartu ezer ez dela ezinezkoa!». Haurrentzako zirku ikuskizun honek era dibertigarri, dinamiko eta parte-hartzailean, inklusioaz eta pertsonek gizartean duten garrantziaz hitz egiten du.
Gaur, Kantuz Eguna
Gaur arratsaldean, Kantuz abesbatzak hartuko du lekukoa, Kantuz Eguna ospatuko baitute, Milagrosan, 19:30etan hasita. Herritarrak gonbidatu nahi izan dituzte.