Bukatu da itxaronaldia, eta hasi dira Hernaniko auzoetako festak! Atzo bota zuten txupinazoa Florida-Etxeberri auzoan, aurtengo Mendekoste Jaiei hasiera emateko; eta horrekin, urtero bezala, ia etenik gabeko haria hasi da josten Urumea bailaran, ia astebururo izaten baitira festak herri edo auzoren batean.
Ez diete nolanahiko hasiera ematen Mendekosteei, gainera. Ohiturak agintzen duen bezala, helduen danborrada atera zen kalera atzo gauean, 23:00etan suziria lehertu eta berehala. Danbor hotsen erritmora ospatuko dituzte auzoko festak, atzoko doinuei segida emango baitie haurren danborradak, gaur goizean. 11:00etan aterako dira kalera, txarangaren laguntzaz, Etxeberriko kaleak alaitzera. Goizean izango da jubilatuen ohiko luntxa ere, jolas herrikoien ondoren. Eta patata tortilla lehiaketa ere egingo dute, sukaldari onena zein den erabakitzeko.
Paella-jatea eguerdian, eta herri afaria gauean
Oso goxoak egongo dira tortilla batzuk, eta beste batzuk... akaso ez horrenbeste. Baina ziur primerakoa izango dela bazkalordurako prestatuko duten paella. Izan ere, urtetako esperientzia daukate Mendekoste Jaietan, eta dagoeneko tradizio bilakatu da paella-jatea, Florida-Etxeberrin. Makina bat lagun bilduko dira mahaiaren bueltan, giro ederrean, goizean zehar jendaurrean prestatutako paella ederraz gozatzeko.
Arratsaldea ere ez da izango aspergarria, inondik inora. Hasteko, zita bana prestatu dute haur eta helduentzat: kirol jolasetan ariko dira gaztetxoak, Denontzatek antolatuta; eta musean helduak, Etxeberri Elkarteak antolatuta. Segidan, aparretan murgilduko dira haurrak, txokolatadarekin berrituko dituzte indarrak, eta Eriz Magoaren emanaldiarekin gozatuko dute familian. Bingo herrikoiak jarriko dio errematea arratsaldeari, herri afariaren aurretik. DJ Nemux arduratuko da musika jartzeaz, aurten ere; eta zezen suzkoarekin eta su artifizialekin borobilduko dute gaurko egun haundia.
Sagardo dastaketak erakarriko du jendea, azkeneko egunean
Bihar izango du segida festak, baina lasaiagoa izango da jaien azkeneko eguna. 11:00etan hasiko dute, hildakoen aldeko mezarekin; eta sagardo dastaketak erakarriko du jendea auzora, eguerdian. Gainera, dastaketak iraun bitartean, Interjaiak sukaldaritza lehiaketaren bigarren edizioa egingo dute, eta osagai sekretuekin egin beharko dute lan sukaldariek. 14:30etan emango diete bukaera jaiei, azkeneko traka lehertzearekin batera.
MENDEKOSTE JAIAK 2023
FLORIDA-ETXEBERRI AUZOAN
GAUR, larunbata
09:00-19:00, Mendekosteen I. W40K Txapelketa, lehenengo blokeko arkupeetan
11:00, Haurren danborrada
11:00, Jubilatuentzako jolas ezagunak eta luntxa
13:00, Patata tortilla lehiaketa
14:30, Paella jana herrikoia
16:00, Mus txapelketa, Etxeberri elkarteak antolatuta
16:00, Kirol jolasak 4-15 urtekoentzat, Denontzatek antolatuta
Jarraian, Aparraren festa
18:00, Txokolatada haurrentzat
19:00, Eriz Magoaren emanaldia, Etxeberriko frontoian
20:00, Bingo herrikoia
21:00-00:30, Disko festa, DJ Nemuxen eskutik
21:30, Afari herrikoia, Etxeberriko frontoian
23:00, Zezen suzkoa eta su artifizialak
BIHAR, igandea
11:00, Meza nagusia, hildakoen omenez
12:00, Sagardo dastaketa (Zelaia, Itxasburu, Petritegi, Eula, Rufino, Zabala, Akarregi, Gurutzeta eta Elutxeta sagardotegiekin); eta Interjaiak II. Sukaldaritza Lehiaketa, osagai sekretuekin
14:30, Jaien amaiera eta azken traka