Ekainaren 7an Hernanin familia bat etxegabetuko dutela salatu zuen Buruntzaldeako Etxebizitza Sindikatuak, Kronikara helarazitako prentsa ohar baten bitartez; eta horren berri eman zuen Kronikak, joan den astelehenean, maiatzaren 15ean.
Albiste horren harira, argibide batzuk eman nahi izan ditu Hernaniko Udalak: «Albiste horretan agertzen diren zenbait datu okerrak dira».
Zentzu horretan, Udalak adierazi du bere «lehentasuna» dela «egoera zaurgarrian dauden pertsonei laguntza profesionala modu integralean ematea, eta horretan ari dira Zerbitzu Sozialetatik. Kasu honetan ere, hilebeteetan aritu dira lanean. Beste kasu guztietan bezala, kasu honetan ere, lehentasunezkoa da pertsonen pribatutasuna, duintasuna eta integritatea babestea».
Albistean argitaratutako baieztapenak, Buruntzaldeako Etxebizitza Sindikatuarenak
Albiste horretan, komatxo tartean ageri ziren Buruntzaldeako Etxebizitza Sindikatuak egindako salaketa eta adierazpen batzuk, eta beste batzuk, aldiz, komatxorik erabili gabe, bestelako formula batzuekin. Gaiak daukan konplexutasunagatik, eta komatxoen erabilera horrek sortu lezakeen eztabaida eta nahasmenagatik, Kronikak honakoa argitu nahi du: albiste horretan argitaratutako baieztapen guztiak, komatxoekin edo gabe, Buruntzaldeako Etxebizitza Sindikatuarenak direla, eta ez Kronikak berak eskainitako datuak eta baieztapenak.