Ohi bezala, Bigarren Eskuko Azoka jarriko dute bihar Hernanin, hileko bigarren larunbatean. Baina oraingoan berezia izango da, bigarren eskuko bizikleten azoka ere jarriko baitute bertan. Goizeko 10:30etatik eguerdiko 13:30etara izango da, eta Atsegindegin egingo dute, eguraldi txarra baitago aurreikusita biharko.
Bizikletak ez ezik, bildu eta salgai jarriko dituzte bigarren eskuko trizikloak, jostailuzko motoak, patineteak, bizikletentzako aulkiak eta karrotxoak, patinak, gurpilak, arropa, babes elementuak... Etxean horietakoren bat izan eta azokan saldu nahi duenak, 09:00etatik 10:30etara eraman beharko du azokara. Ondoren, antolakuntza taldea arduratuko da horiek zaintzeaz eta saltzeaz, eta jabeek 13:30etan bueltatu beharko dute azokara, saldutakoaren dirua edo objektuak jasotzera.