Puntako esku pelotariak izango dira gaur Hernanin, goizean eta arratsaldean. Izan ere, kiroldegiko frontoian jokatuko dira Berria Txapelketaren final zortzirenetako aurreneko bi kanporaketak. Goizean, Lazkaoko Lapke eta Irurtzun ariko dira aurrez aurre, 11:00etan hasita; eta arratsaldean, Doneztebeko Erreka eta Ortuellako Danok Lagunak, 17:00etatik aurrera.
Lapkeren ordezkari izango dira Izagirre eta Iturbe, kadeteetan; Zubizarreta eta Goiburu, gazteetan; eta Senar eta Garmendia, nagusietan. Irurtzunekin, berriz, jokatuko dute Salaberria anaiek kadeteetan; Salaberriak eta Salcedok, gazteetan; eta De La Fuentek eta Bergerak nagusietan.
Arratsaldean, berriz, Beñat Apezetxea goizuetarrak jokatuko du Errekarekin, gazteetan, Agestarekin batera. Martinez eta Lopez izango dituzte kontrario. Kadeteetan, Barbarin eta Agesta II ariko dira Errekarekin, eta Txabarri eta Brull Danok Lagunakekin. Eta nagusietan, azkenik, Tabar eta Cuairan izango dira Errekaren ordezkariak, eta Kortazar eta Vega Danok Lagunak taldearenak.