Berdintasuna Enpresetan formazioaren bigarren saioa egingo dute bihar goizean, Hernaniko Iturola Elkarlan Sorgunean, Beterri Saretuzek antolatuta. Goizeko 11:30etan hasiko da, eta oraingoan, lanketa feminista egin eta mikromatxismoak identifikatuko dituzte.
Otsailaren 22an egin zuten aurreneko saioa, berdintasuna lantzeko planetatik praktikara nola pasa aztertzeko, Elhuyarreko Joana Regueiroren eta Hiruki Larroxako Ibai Fresnedoren eskutik. Biharko saioan, berriz, praktikan gehiago sakontzea da helburua: Nora begiratu? galderari erantzunez, enpresetan lanketa feminista nola egin eta mikromatxismoak identifikatzeko moduak aztertuko dituzte.
Saioa zuzenduta dago Beterri Buruntza eskualdeko proiektu eta kooperatibetako kide guztiei, eta izena emateko epea zabalik dago oraindik, beterrisaretuz.eus webgunean.
Gainera, aurreratu dute maiatzaren 11n egingo dutela Beterri Saretuzen ikasturte amaierako topaketa, egitasmoko partaideek; eta «mugarri bat» izango dela «orain arte egindako bidean».