Hirugarrenez jaso du CAF-Elhuyar saria Iñaki Sanz-Azkue biologo hernaniarrak, zientzia kazetaritzaren kategorian. Asteazken arratsaldean jaso zuen saria Usurbilen, Dragoi txiki bat egongelako horman lanagatik, Gaur8 astekarian argitaratutakoa, iazko uztailean.
Begiratu urrunera lelopean banatu dituzte aurtengo sariak. Helburua, ohi bezala, izan da bultzatzea, saritzea eta aitortzea zientziaren eta teknologiaren arloko gaien eta ikerketen euskerazko dibulgazioa, kazetaritza eta gizarteratzea. 41 lan aurkeztu dituzte aurtengo edizioan, eta horietatik lau saritu dituzte, kategoria ezberdinetan.
Zientzia kazetaritzaren saria eskuratu du Sanz-Azkuek, dragoi txikiari buruz egindako lanagatik. «Gai garrantzitsu bat landu du artikuluan, klima-aldaketa; baina gaiaz harago, zein ikuspegirekin landu duen iruditu zaigu azpimarratzekoa», adierazi du epaimahaiak: «Izan ere, klima aldaketari buruzko artikuluek hondamendi kutsua izaten dute askotan, eta oraingoan, berriz, egileak xumetik eta txikitik heldu dio, eta estilo argia eta atsegina erabili du».
Gainerako sarituak, honakoak izan dira: Judith Zubia Aranburuk jaso du dibulgazio artikulu orokorraren saria, Garena egiten gaituena, egiten duguna idazteko lanarekin; Mattin Urbieta Galarragak egile doktore tesian oinarritutako dibulgazio artikuluaren saria, Elektroiekin dantzan nanoeskala argitzeko lanarekin; eta Aitor Garmendia Etxeberriak lehen sektoreko lanak saritzeko helburua duen NEIKER saria, Aralar, balioen eta interesen aniztasuna parke natural batean lanarekin. Horiez gain, merezimendu saria ere eman dute, eta Jacinto Iturbe Barrenetxeak jaso du aitortzea.