Datorren asteazkenean, maiatzaren 3an, hasiko dituzte Urumea eskola zaharraren eraikina botatzeko lanak, Hernaniko Udalak jakinarazi duenez. Barrutik hustutzen aritu dira azkeneko hilabeteotan, eta eraisketari ekingo diote orain.
Hori horrela, eta segurtasuna bermatzeko, bezperan hasiko dira inguruko aparkalekuak husten. Udaltxaingoak abixuak jarriko ditu hustu beharreko aparkalekuetan, eta horietan ibilgailurik ez uztea eskatzen zaie herritarrei, astearteko goizeko 09:00etatik aurrera. Izan ere, hurrengo egunean, asteazkenean, makinak sartuko dira, eta aparkalekuaren aldetik hasiko dituzte eraisketa lanak.