Zubietako erraustegira martxa antolatu du Errausketaren Aurkako Mugimenduak, bihar goizerako, Erraustegia, airea, ura eta lurra kutsatzen lelopean, erraustegiaren «errealitate kutsatzailea agerian uzteko». Hirugarren urtez egingo dute, goizeko 11:00etan Lasarte-Oriako Okendo plazatik abiatuta; eta martxarekin bat egiteko deia luzatu die Hernanin Zero Zaborrek, herritar guztiei.
Donostia Bizirik, Eguzki eta Ekologistak Martxan elkarteek ere babestu dute martxa, eta Lasartetik Zubietan eraikitako erraustegiraino joango dira oinez, agintariei exijitzeko «gelditu dezatela erraustegia, ez dezatela gehiago hondakinik erre, ez Zubietan, ez Añorgan, ez Bergaran eta ez inon».
Salatu dutenez, «GHKk eta Aldundiak, ukazioaz eta propagandaz, beti diru publikoa lagun, pareta bat eraiki dute erraustegiaren errealitate kutsatzailea ezkutatzeko. Baina pareta horretan arrakalak gero eta ugariago dira. Erraustegiaren arduradun eta propagandistek errealitatea ukatzen jarraitu arren, azken hilabeteotan argitara atera dira ezkutatutako egia deseroso batzuk».